AF268: 59r

4 Çeküp cellādlar yalıñ qılıçlar üstüme gūyā
ʿAlevlerdür görinen dūd‑i āhumdan olub peydā
Senüñ ḥayfuñ degüldür pādişāhum gerçi‑kim ammā
Gülistānında yazmış Şeyḥ [!] Saʿdī‑yi suḫan‑ārā
Buyurmuş qurb‑i sulṭān āteş‑i sūzān būd şāhum
Muqarrer oldı kim qurb‑i şerīfüñ bāʿis̱‑i ġavġā
Yine maʿnāda senden ẓāhir oldı emr‑i ḥaqq icrā
Şehā cellād‑i ġamzeñle beni qurbān ėden sensin
Vücūdum gencini ifnā ėdüb virān ėden sensing

5 Dem‑i surḥum [!] ser‑ā‑pā‑yi semendüñe nis̱ār olsun
Nedür kemter quluñ şāhum fedā biñ baş u cān olsun
Ġubārīye [?] naẓar qıl luṭfuñ‑ile kām‑rān olsun
Oqunsun ḥasb‑i ḥālüm naẓmı ḫalqa dāstān olsun
Büküb şimşīr‑i qahruñ düşmenüñ qaddi kemān olsun
Sihām‑i nuṣrete qavm‑i ʿadū başı nişān olsun
Bu maṭlaʿ ḥaşr olunca bendeñe vird‑i zebān olsun
Şehā cellād‑i ġamzeñle beni qurbān ėden sensin
Vücūdum gencini ifnā ėdüb virān ėden sensin

tārīḫ‑i qatl‑i mīr‑i mīrān

remel: fāʿilātün ‑ fāʿilātün ‑ fāʿilātün ‑ fāʿilün

Egmez‑iken dehre başın ol nedīm‑i kāmrān
Ser‑furū ėtdürdi āḫir gendüyi cellād‑i şāh
Ėtmez‑idi qaṣr‑i ʿālīden ġurūrından firār
Mesken oldı cismine āḫir anuñ ḫāk‑i siyāh
Üç veẕīrin refʿ ėdicek qatline tārīḫ olur
Cehd ėdüb begler beginüñ boynın urdurdı sipāh

tārīḫ‑i dīger:

hezec: mefāʿīlün ‑ mefāʿīlün ‑ feʿūlün

Be‑ġāyet ẓulm [ü] ḥīle çün ėrişdi
Temāmet [?] Rūm ėline fitne düşdi
Ėrişdi nā‑gehān ḥükm‑i ilāhī
Ġulām‑i şāhīler başına üşdi
Bir eksikle dėdi begler beginüñ
Bugün tārīḫine āfet ėrişdi